28‏/08‏/2010

أنا والفيزياء ولا حد تالتنا

(12)


تخيل نفسك قدام سد منيع وبتحاول تهده عشان تتخطاه
أو أنك على حافة حفرة واسعة وبتحاول تعديها بدون أي إصابات
هو ده موقفي قدام مادة الفيزياء .. بعبع الثانوية العامة ...!!


حكايتها معايا مدتها سنتين .. في البداية ماكنتش خايفة منها وكنت بحاول على قد ما اقدر أني اتجنب سماع أي كلمة عن مدى صعوبتها وعن كونها بعبع الثانوية العامة .. بما أن سنة ثالثة كانت بسيطة بالنسبة لي لأني تخصص رياضيات فكانت تعتبر المادة الأصعب والأتقل وكنت شبه متفرغة لها ومدورة لها على الأفضل في المدرسين والكتب .. في الأول كانت خفيفة بسيطة ومفهومة لكن كل ما كانت تدخل في الغويط كل ما كانت تتعقد تتكركب وتتلخبط.


دايما اسمع من كل سوابق ثانوي عن أنها ياما لبّست جبابرة المذاكرة في الحيط وأنها كانت في كتير من الأحيان السبب الرئيسي في ضرب المجاميع.
وبما أني مش من جبابرة المذاكرة فكنت فريسة سهلة لها .. زي ما تكون الفيزياء قعدت مع نفسها وقررت أنها تقف في وشي وقالت (لا تصالح) بيني وبينها مع أني كنت شارياها وحاباها وناوية لها على كل خير.


وعشان نيتها كانت معايا سيئة للغاية فكل الأبواب اللي ممكن تطلعني منها كانت مقفولة .. هي المادة الوحيدة اللي اخدت فيها عند 4 مدرسين ..!! كلهم كانوا بطاطس ما عدا واحد بس كنت هكمل معاه لكن عشان الباب أصلا مقفول ومن حظي تعب ووقف دروسه فماكانش قدامي غير أني اعوض النقص بمجهود جبار ....
كانت أكتر مادة بذاكرها وكان لازم كل يوم اذاكرها قبل أي حاجة تانية بس برده عائق ..!!
كل ما اذاكر حاجة مش افهم وكل ما احفظ حاجة تطير وكنت اقعد قدام الأسئلة شبه اللي مش بيعرف يقرأ أساسا ...
ليالي المذاكرة معاها كنت ببهدل فيها مكتبي واوضتي ونفسي ... دايما كنت اصوّت واشد في شعري واقطع ورق واقطع كتب ومذكرات وياما بهدلت كشاكيل كتابة وشخبطة ومرمطة .. ومافيش فايدة ..!!


في توقيت امتحانها كان عندي مدة أسبوع اذاكرها .. لكن عشان كنت
فقدت الأمل فيها لدرجة وصلتني للإيمان بأني هشيلها ماقدرتش استغل الوقت كويس وقضيت الأسبوع ده بأسوأ حالة كنت عليها وكان يعتبر اسوأ أسبوع قضيته في امتحانات قبل كدة ....
كنت لأول مرة أخاف من مادة وابقي مش قادرة اذاكرها .. لدرجة أني ليلة الأمتحان ماكنتش قادرة اشوف قدامي وجسمي كله كان بيرتعش وبعيط لا إرداي وبحاول احصّل أي حاجة وعمالة ادعي وخلاص حتى ماقدرتش أنام ....
وعلى توقيت الامتحان بابا شافني واتخض من شكلي وكنت بتحايل عليه أني مش اروح لكن هو ماكانش متخيل مدى سوء الحالة اللي كنت فيها ....
وفي طريقي للمدرسة كانت ركبي بتخبط في بعضها فعليا .. وفي الامتحان كنت في حالة عصبية بشعة وماكنتش شايفة ورقة الأسئلة كويس .. الدنيا كانت بتتلخبط والكلام بيدخل في بعضه ...
لأول مرة اظهر في حالة كدة .. اتعصبت ع المراقب لأنه كلمني وطلبت منه مايركزش معايا لأني ممكن افقد أعصابي واطلع اللي فيا عليه في أي لحظة .. وبمجرد ما الوقت انتهى اخدت بعضي وع البيت ....
كل اللي سألني قولت الحمدلله وخلاص .. بس وشي كان باين عليه طبعا .. وقاطعت التليفونات يومها وأي وسيلة اتصال بيني وبين أي حد عاوز يطمن .....


في الفترة ما بين انتهاء الامتحانات والنتيجة منعت الكلام عن اليوم ده عشان كنت بحاول اقنع نفسي أني هعدي منها .. وساعة النتيجة ما ظهرت وشوفت (دور ثاني فيزياء) زي ما يكون الوقت وقف والدنيا كلها وقفت وفقدت قدرتي على النطق وقعدت شبه المشلولين قدام شاشة الكمبيوتر وفجأة وشي أحمّر واتعصبت وبقيت بكسر كل اللي حواليا .. عمي روحني يومها بالقوة وتقريبا كان بيرفعني من على الأرض بالعافية ....
قضيت يومها ليلة لا يمكن يكون فيه أسوأ منها .. دموعي كانت بتنزل لا إرادي وبلا نوم وقعدت أسبوع بعد النتيجة فاقدة شعوري بالعالم الخارجي لدرجة أني كنت بتعالج لحد ما فوقت عشان أحل الموضوع واعدي منها ....


أول حاجة عملتها أني رجعت الكتب تاني اللي كنت المفروض هشيلها وبقلب فيها لقيتني كاتبة في كل كتاب وفي كل ورقة تقريبا (مش هعدي - مش هنجح - أنا هشيلها - أنا هسقط - أنا فاشلة ... إلخ) وكنت بتفرج بذهول غريب .. ازاي قدرت اقنع نفسي بكل الكلام الفاضي ده وازاي النتيجة كانت كدة ..!!
تاني حاجة عملتها أني روحت راجعت ورق الإجابة عشان اشوف المشكلة عندي فعلا ولا فيه مشكلة في التصحيح .. وكانت الفضيحة الكبرى أني مبدلة الإجابات وملخبطة الأسئلة وكان فيه شخبطة كتير اوي .. معقول كنت مش مركزة خالص كدة ..!! ومن هنا كان لازم ادخل امتحان الدور التاني.


ولأن القانون الفيزيائي المتعلق بيا ينص على أني أكون على حافة الهاوية دائما .. فحصل في الدور التاني نفس اللي حصل في الدور الأول بالمللي .. لأني اقنعت نفسي برده أني مش هقدر اذاكرها تاني ولا ادخل امتحانها .. بس كنت على أمل صعيف أني اعدي وخلاص ومع ذلك حافظت على الكتب في المكتب ماخرجتش إحتسابا لما قد يكون .. وكانت النتيجة نفس النتيجة ..!!
ومن هنا كان إعادة سنة كاملة عليها.


كانت سنة فراغ على حق .. مش مجرد لقب اطلق على السنة دي بسبب سادسة ابتدائي اللي حشروها في النص فعملت سنة فراغ ..! دي فارغ عليا أنا والفيزياء يعني بقيت أنا والفيزياء ولا حد تالتنا.
المفروض أني اعيد التجربة من جديد بس اطلع منها سليمة ...
وعيدت الكرة من جديد مدرس بطاطس جديد - ما هي مادة منحوسة - وهي نفس الصعوبة بس حاولت اشيل من دماغي فكرة أني هشيلها دي رغم أنها كانت مستحوذة دماغي .. وهي نفس الأحاسيس والمشاعر اللي سبقت الإمتحان ونفسها المشاعر اللي كانت بعد الامتحان .. مع الإحتفاظ الكتب في مكانها في المكتب إحتسابا لما قد يكون مرة أخرى - ما هي عشرة بقي -.


يوم النتيجة كان كل همي أني مش اشوف اللون الأحمر مكتوب بيه أي حاجة ...
وكانت الصدمة المضحكة وبمعجزة إلهية اخترقت السد المنيع من خرم صغير ونجوت بأعجوبة من السقوط في الحفرة ...
كانت نتيجتي درجة النجاح بالظبط 50/20 ..!!
وما زالت الكتب في مكتبي حتى الآن إعتبارا لاي نية جديدة للفيزياء معايا.


ضحى حلمي

17‏/08‏/2010

كل سنة وأنا ضحى


خلاص بقيت 18 سنة بالتمام والكمال
مع أني كان أخر طموحي يكون عندي 17 سنة
أخر سن أقدر احكم على نفسي فيه بأني لسه عيلة .. وما أحالاها المعيلة
وبعدين السن ده له ميزة حلوة جدا في أني
اقدر أعيل وقت ما أحب - معذورة لسه صغيرة - .. واقدر اعقل وقت ما أحب برده - ياااه عقلها كبير -

المشكلة أني حاليا مطالب مني أني أكبر وابطل شغل العيال بتاعي
واتعامل مع نفسي - قبل الناس - على أني عاقلة وهادية ورزينة


مش عارفة ليه دماغي مش قابلة الأفكار المرعبة دي
ومحتفظة جدا بتصرفاتها وبطريقتها وبأسلوبها .. محتفظة بطفوليتها
لكن العمر مش بيقف فلازم ارضى بالأمر الواقع
إنما مش واقع مرير أوي
فيه صلاحيات برده بعد الـ 18 ...:
اقدر ادخل أفلام من نوع (للكبار فقط) بدون أي مشاكل - هع هع -
لما اتصل ببرنامج أسامة منير ويسألني عن سني هيكمل معايا للأخر من غير ما يقولي أنتي لسه صغيرة وبدري عليكي الكلام ده زي ما بسمعه بيقول للبنات تحت سن 18
اقدر اطلع رخصة قيادة

كل سنة وأنا طيبة .. كل سنة وأنا ضحى


ضحى حلمي

14‏/08‏/2010

الخير على إيديكم دايما

تحديث
اسماء الادوية المطلوبة
اولا : فيجام--امينو جلووبين ivig--ال 5 جرام ب 1170
ثانيا : وان الفا نقط سعر ة 186 جنية
ثالثا: مينارين اسبراى ب 115 جنية
رابعا: بنتازا ب168 جنية
خامسا: تينام

سادسا: كولشسين المستورد
سابعا بالميكورت-كالسيمات-ريميكاد حقن-الواحدة ب 3000 جنية


كل عام و انتم بخير
و رمضان كريم

http://3.bp.blogspot.com/__3dbFRNH4SE/TGP8697efLI/AAAAAAAAAgQ/BvGLv0NBnag/s1600/ramadanday.jpg

يوم الخير فى رمضان اللى بنعمله باشوفه من احلى ايام المدونين فى السنة كلها
يمكن لان جو رمضان بيخلى كل واحد فينا مش محتاج تشجيع علشان يعمل الخير
او لان ربنا بيحب الاطفال فبيسر لعدد كبير منا انه يشارك فى اليوم ده
مش عارفة بالظبط ايه السبب اللى بيخلى اليوم ده رغم صيامنا و تعبنا ..يوم من احلى ايام السنة


فى دعاء سمعته من ناس فى المستشفى بيرن دايما فى ودانى ..ربنا ما يقطع لكم عادة
و علشان منقطعش العادة الجميلة دى
بيشرفنى ادعوكم ليوم خيرى فى رمضان نزور فيه الاطفال فى مستشفى ابو الريش
و نتجمع سوا على فطار ..حتى لو كان بيتاخر علينا او طعمه مش حلو اوى .. بس بيكون جميل بوجودنا سوا
يوم السبت 28 اغسطس


المرة دى التبرع هيكون مش محدد
يعنى كل واحد و قدرته
دوا - لبس - فلوس - لعب
و هنضيف اسماء بعض الادوية اللى المستشفى بتحتاجها دايما و فيها نقص عندهم
بخصوص نوعية الهدوم: الناس دي غلابة. يفضل بس أغلب اللبس يكون مشترك يعني ممكن للنوعين... لو مقاس كبير هيشمره و لو صغير هيلاقوا مليون حد يدوه له، لو صيفى هيلبسوا عليه حاجة يبقى شتوى ولو شتوى هيلبسوه على اللحم و يشمروا كمه
، ببساطة يعني ... و الله ما هتفرق معاهم

بخصوص الالعاب : ممكن الوان و كراسات رسم .. ممكن شطرنج أو سلم وتعبان أو دومينو .. دبدوب ممكن للأطفال وعروسة للبنات .. لعبة بتتزق زي العجل أو القطر ... ممكن لعبة المزرعة ... ممكن الصلصال للأطفال الكبيرة شوية ...

اما الفطار
فلحد دلوقتى المكان المقترح هو ابو خالد بوسط البلد
بس باب الاقتراحات مفتوح لو حد عنده مكان افضل و يكون قريب من وسط البلد


ده ايميلات الناس المسئولة عن اليوم
kouskoza7@hotmail.com

kh_cyc2006@hotmail.com

و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح
وده هيكون شغال قبل اللقاء باسبوع فقط
0148693432

خالد صاحب مدونة همس الاحباب
0101345140

اللى يقدر يعمل اعلان فى مدونته و يرفق معاه صورة اليوم يبقى جزاه الله كل خير

مقتبس من مدونة قوس قزح


10‏/08‏/2010

ميلاد ولد وبنت


محمود أنور وآلاء حلمي
انضموا لعالم المدونين اللولبي وطلعوا لنا بــــ
--- ((ولد وبنت)) ---


بعد معاناة تفكير طالت في التفكير في مقدمة كـ أول بوست ينزل
وتفكير في النظام اللي هـ يمشي عليه في كتابة الموضوعات
وتفكير في الموضوعات اللي هـ يكتبها أساسا
قرر محمود أنه ما يفكرش خالص وبدأها بـ أوعى تفكر


وعشان أحنا في إيدينا نختار الطريقة اللي نعيش بيها
وفي إيدينا نخرج من الإكتئاب اللي بـ نغوص فيه مع كل مشكلة أيا كان حجمها
وكـ نوع من زرع الأمل في الحياة
آلاء بـ تثبت كلامها في توضيح بسيط لتجربة عاشتها بـ حبة تفاؤل


مش هـ تكلم كتير عنهم وعن المدونة
بتمنى كتاباتهم تنول إعجابكم
المدونة بين إيديكم
ولـد وبنت


ضحى حلمي