30‏/09‏/2011

Facebook Updates!


بعد التطورات الجديدة في الفيس بوك
واللي طبعا الغرض منها زيادة الإقبال ع الموقع بعد كثرة مواقع التواصل الإجتماعي وخصوصا بعد ظهور Google+
الواقتي الـ Profile اصبح بشكل جديد والـ Home نفس الكلام وزاد عليهم الـ Ticker اللي بيديك موجز أنباء كل اصدقائك بتصفحاتهم في الموقع!
وده اخر التطورات يعني


بما أني من المخضرمين اللي شهدوا الـ Facebook في أول بداياته
لما كان بدائي جدا وكميلة كدة وعلى قد حاله خالص!
كنت ببوس ايدي وش وضهر أني بعرف اعمل Comment عند حد لما عملوا الحركة دي!
وكانت جدا فكرة أن الواحد يكتب على الـ Wall في أي وقت ويترد عليه في أي وقت بدون بقي messenger والليلة العبيطة دي .. فكرة عبقرية جدااااا!
ده قبل ما يبقي الـ Comment مشاع يعني ..
كان حلو كدة وعلى قد الاتنين اللي بيتكلموا وخلاص!

ده طبعا تحقيقا للهدف اللي الموقع ماشي عليه
تحت شعار: الفضيحة عندنا أكتر!
أنا احب التطورات اه .. لكن ما احبش الفضايح!!


بعد التفكير العميق في التطورات دي
تخيلت تطورات تانية ممكن جدا انها تحصل
وممكن تكون عن طريقي اقتراحات لمارك فيطبقها مستقبلا

لأنه مع تطور التكنولوجيا وسرعتها
لازم طبعا يواكب العصر الجديد ..

واحد من الإقتراحات
هيتحول الموقع لشاشة فيديو كبيــــرة
مع إلغاء كل الخصائص الكتابية دي لراحة المستخدم
ويكون الموقع عبارة عن شاشات فقط
الجزء الخاص بحسابي متوسط الصفحة وحواليه كل الـ Online
بنتكلم كلنا في نفس الوقت .. شايفين بعض .. عارفين بيعملموا ايه
لهدف تسهيل التواصل وراحة المستخدم
بدل كتابة الإستاتيوس ورفع الصور ونقل الاخبار .. اللي طبعا كل ده بياخد وقت كتير من وقتنا الثمين في الكتابة
كل حاجة هتقولها في لحظتها
والفيس يسجل وراك فيديوهاتك تلقائيا
بس أهم حاجة لما يحصل حاجة زي كدة .. ماتغيرش هدومك وأنت قاعد ع الفيس
لأن في لحظتها هتلاقي الفيديو بتاعك منشور في كل مكان!


يتحوّل بقي فيس بوك ده
لمحرك بحث ضخم عن البشر
ويقلب ويبقي هو الاساس ع النت في كله مثلا!
وممكن يدفعنا فلوس على شوية حاجات في الموقع!!


أو ممكن بقى مع الوقت
بما أن العالم الإفتراضى قرب يكون هو العالم الواقعي والآية تتعكس خالص
يوفر كل حاجة الواحد مضطر يتحرك لها
فيسهل الحياة أكتر ويختصر وقت كتير كمان!


ولكم أن تتخيلوا اللي ممكن يحصل في الفيس بوك مع الوقت!
أي نعم أنا بحب التطورات .. بس ربنا يستر!!
يا ترى هتعمل فينا ايه يا سي مارك ....


ضحى حلمي

21‏/07‏/2011

فاعل مزنوق !


كائن هلامي لزج, ذو عينان نظرهما ثاقب تتحركان في كل الإتجاهات لتراقب المطلوبين
وأنف طويل معقوف دائما ما يُحشر في غير مكانه, بينه وبين مخبرين أمن الدولة تشابهات كثيرة....
يؤمن أنه مصدر التوجيهات لكل من اخذ حيزا كبيرا في تفكيره وربما لجميع المعارف, ويظن أن واجبه العظيم أرسال تقارير عن كل اللي شافه خلال يومه للمعنيين, خاصة فيما يتعلق بالناس !


دائما يلتصق في أحد زخانيق إطار محيطك .. فلا بتشوفه ولا بتحس بوجوده إنما هو شايفك كويس جدا كما لو كان جنبك .. وأحيانا بيكون على مرأى منك ولا يخطر على بالك أنه يكون هو!
غالبا لا بيسمعك ولا يعرف بتعمل ايه بالتحديد .. لكنه بيحكم عليك من وجهة نظره الخاصة, وبيحطك في صورة ما بالتأكيد مش هتعجبك لكنها على هواه !
الكارثة أنه لا بتربطك به أي علاقة وعلى الأرجح مش يعرفك شخصيا .. لكنه في أغلب الأحيان بيكون عاوز حاجة معينة منك!


الكائن ده اسمه "فاعل خير" ..
أكيد طبعا مش القصد هنا على الشخص اللي بيقدم الخير فعلا .. لكن القصد على شخص دائما بيحاول يوصل لك رسالة من غير ما يذكر أسمه فبيختبئ ملوثا لطهارة الإسم ورا اسم فاعل الخير!
الله اعلم مين عطاه الإسم ده, أو الأصل التاريخي له ايه, أو مين صاحب الأسبقية في إستخدام الإسم لأغراضه الغريبة!
لكن مش هيفيد لو عرفنا مرجعية الإسم, لأن أكيد اول واحد استخدمه .. مات!
والتاريخ .. مش هنعرف نغيره!
المهم مش دي المشكلة ...


المشكلة أن الكائن ده مع أنه عارف أن اللي بيعمله بيخنق العالم جدا, وأن الوظيفة اللي وظـّف نفسه فيها مش مريحة نهائي لأي حد .. بس بيستهبل!
وجوا نفسه ودماغه اللي أكيد فيه جزء ناقص أو ملعوب فيه بطفاشة مقتنع تمام الإقتناع أن اللي بيعمله وراه مصلحة .. سواء كانت له أو للي بيتزنق في حياته!


ولأنه كائن غير معروف الهوية أو محدد المعالم, الوصف الموضح فهو من إختلاقي بناءا على تجربة شخصية حيث أن كان للمذكور اعلاه دور في حياتي الفترة اللي فاتت كبيــر وقابل للتضخم, وافتكر أني حاولت اصاحبه كمان تجنبا لرزالته .. لكنه للأسف صديق ثقيل الدم بدرجة كل اللي جربوه عارفينها – لا توصف الحقيقة! – وتجربتي معاه كانت ببساطة عبارة عن شبكة عنكبوتية مشتركة ملزقة أكثر من الحر اللي أحنا عايشين فيه ده, علقت فيها بإرادته ...!!!
لكن ولسوء حظه عشان دماغه مجزّمة على اراءه فقط .. اكتشفت أنه ما بيفهمش وما اتعلمش إحترام الخصوصيات .. أصلااا!


أنا عندي رسالة تلح عليا بشدة لصديقي الغير مرغوب فيه إطلاقا!
السيد فاعل خير:
ربنا خلق كل بنى آدم على وش الأرض لسبب ما
يعني أنت وجودك في الحياة له هدف
لكن اكيد الهدف ده .. مش أنك تتدخل في شؤون الآخرين
وتوجه نصايحك العظيمة والحكيمة - ولو أني اشك في كلا الصفتين! - لكل اللي حواليك بما فيها من حشر بالعافية ولا يطاق في حياتهم
أرجوك بشدة, ومن كل قلبي .. تدور على هدف تاني تعيش له .. وتبطل تلف ورا الناس وتنخر في تفاصيلهم اللي مش هيعود عليك منها بفايدة ابدا غير........... ممممم إن بعض الظن إثم والله عالم بأفكارك!
وإن كنت مزنوق أوي في كلمتين لحد, روح قولها له في وشه وبلاش الشغل المتداري ده .. فإذا كان عندك قناعة أنه هيسمع لكلامك أكيد مش هتتضر, لكن لو مقلق وجه له النصحية أخوياً وسيبه بقي لنفسه أنت كدة كدة مش هتتضر برده ...
إنما بقي لو متأكد أنه هيتغابى عليك وده الأكيد بيحصل بما أنك غريب وغير مريح .. بلاهم خالص الكلمتين دول واكتبهم على ورقة واقراهم لنفسك 30 مرة يمكن يهدوك وترجع عن مضايقة خلق الله ....
سيب كل حى لحال سيبله, وأنت كمان شوف سكتك فين .. طريقك أخضر!


ضحى حلمي

01‏/07‏/2011

على قدي .. عمر سنتين

النهاردة بحتفل بمرور سنتين على ميلاد "على قدي"

لأنى فقدت قدرتي على الكتابة
واصبح من الصعب تجميع الأفكار وترتيبها .. وتخيل ما يمكن الكتابة عنه
رغم كل الموضوعات التى مرت دون أن استطيع التعبير عنها !

فأنا اقدم خالص اسفي وإعتذاراي
للإنشغال عنها لفترات طويلة ..
وشبه التوقف عن الكتابة !

على قدي ..
كل سنة وأنتي بخير
:)

18‏/03‏/2011

نعم المفروضة !


الشارع فيه عملية سيطرة وفرض رأي لـ إستفتاء التعديلات الدستورية
في كل مكان معلّق لافتات بـ تدعو للمشاركة في الإستفتاء بـ نعم ..!


منشورات بـ توزع على كل الناس ..!
وصلتني في المعهد, لقيتها في مكان عمل والدي
لقيتها في بيوت أصحابي, ولقيتها في بيتي كمان ..!
كلها بـ تدعو للمشاركة بـ نعم ..!!!!


من منابر المساجد والجمعية الشرعية
عربيات في الشوارع بـ تلف
بنفس الرأي , نعم للتعديلات الدستورية ..!!!


حفاظا على مكاسب الثورة
من أجل الحرية والعدالة
للإستقرار والأمان
لمستقبل أفضل


سواء كان الهدف من الدعوة دي المصلحة العامة, ومصلحة مصر
أو مصلحة شخصية للجهات القائمة بعمليات الفرض دي
حيث أنهم الأكثر تنظيما وإستعدادا لخوض المرحلة القادمة
في إنتخابات مجلسي الشعب والشورى, وإنتخابات الرئاسة ..!!


الوضع ده غايظني جدا بشكل مش طبيعي
الثورة دي كان من أهم مطالبها :
الـحــريــــــــة


فين تحقيق الحرية اللي طالبنا بيها .. لما انزل الشارع أوزع منشورات
تعرض لي وجهة نظر, بدون ما تعرض لي وجهة النظر المخالفة ..!


معترضة جدا على نشر وجهة نظر نعم ..
وأسبابهم للموافقة ونتيجتها
وكنت هعترض برده لو كان نشر وجهة نظر لا هو اللي حاصل ..!
الموضوع مش أني مع أو ضد الجهات اللي بتنشر رأيها
أو أنا مع أي رأي ..!!


الفكرة أني كنت مستنية منشورات
تعرض لي الطريقين, أسباب الطرفين
والخطط اللي رسمتها القوات المسلحة لـ الوضع بعد كدة
ويسيبوا لي حرية الإختيار
اللي اشوفه أنسب وأفضل, ويرضي ضميري ويقنعني فعلا


وللأمانة .. فهي لافتة واحدة بس اللي شوفتها كانت دعوتها للمشاركة
(أول إختبار لنا في الحرية .. شارك بصوتك)
ليه ماكانش فيه لافتات كتيرة زي دي ؟؟؟
ليه سيبنا الشارع تحت سيطرة جهة ما ورأي واحد بس ..!!!


ضحى حلمي

12‏/02‏/2011

إسفنجة النظام .. نشفت !


الحدث الأكثر بروزا وضجة وإثارة للغضب
هو : معركة الجمال !
طبعا كانت فكرة سيئة جدا من الوطني للرد على المتظاهرين
الحصان والجمل VS تويتر وفيس بوك
يا سلام !
منافسة تثبت حقيقي الفجوة بين جيل الشباب وجيل النظام
ثورة قامت بالتكنولوجيا وبتتهاجم بالبهائم !!
الناس دي بتفكر ازاي يا جدع ؟!
يخرب بيت الشيخوخة ...


وبعدين البلطجية اللي نزلوا دول عقلهم كان فين !
سيبك من البلد والمصلحة العامة وكل الليلة الوطنية دي
إزاي وافقوا ببساطة كدة أنهم ينزلوا يضربوا الناس
في مقابل 50 جنية أو حتى 200 جنية ووجبة من كنتاكي بس
يا راجل شوية اوي ..
ع الأقل كنت استغل الموقف واطلب أكتر من كدة
كانت مصلحة حلوة تنفعك للزمن
علموكوا فين !!


المهم أن الحوار ده ماوصلهومش لحاجة
واستمرت المظاهرات وزادت أكتر
واصبحت المظاهرات مليونية ..
الناس بتتوافد على أماكن التجمعات
وناس بتنقل إقامة التحرير
والسيطرة بقت في إيديهم
ومش ماشيين إلا لما المطالب تتحقق
رغم أن الحكومة بتجاهد عشان تفض الحوار


لازم المطالب تتحقق طبعا !
والحوار مش هينفض إلا لما الحال يتصلح الأول
لما الكرامة ترجع .. هنروّح
ليهم حق !
وبعدين الحكومة دي غببة بجد ..
الناس ليها مطالب معينة ودول كل شوية يدوا في وعود
مافيش حتى حتة منهم إتحققت عشان يرجعوا الثقة تاني
ومصرّين على فكرة (حرية التعبير)
شكرا ع الحرية الفظيعة دي .. بس خدنا منها ايه
جابت لنا الكافية ...
وبنصوّت كل يوم على أمل أن حد يعمل حاجة أو يتحرك
لكن عاملين طرش !
مش عاوزين نسمع كلام .. عاوزين نشوف أفعال


يوم الخميس .. كان يوم مهم جدا
القوات المسلحة طلعت ببيان أول ما افادوش بيه أي مطالب
مجرد إعلان أن فيه إجتماعات دورية قائمة
- صراحة أنا اتنقطت ساعتها .. إنما كتــّر خيرهم -
وبعدها بشوية طلع الريس لتالت مرة
المرة دي كان مختلف ..
طبعا الناس كانت متعلقة بأمل أن الريس يتنحى
زي ما كل الأخبار والتليفزيونات والمحللين قالوا
توقعا للي جاي بعد بيان القوات المسلحة


ومع البيان كانت خيبة الأمل !
مجرد وعود بتحقيق المطالب .. معلقة بأن الناس يرجعوا بيوتهم
وبرده متبت فيها بأيديه ورجليه وسنانه .. ومافيش رحيل
طيب تديني أمان منين واديك ثقة ازاي !!
وبعده على طول اتكلم السيد النائب .. بـ بيان تأكيدي على بيان الريس
- ياريتك ماطلعت .. ماجبتش جديد -
وثار الناس من تاني وقولنا الدنيا هتبقي حريقة أكتر
و"مش هنمشى .. هو يمشي"


وعدى نهار الجمعة في إنتظار للي جاي
وتخطيط لأسبوع كمان من المظاهرات المستمرة
بس كانت المفاجأة بخطاب من نائب الرئيس بـ تنحى الرئيس
والقوات المسحلة هتتولى أمر البلد لحد ما تتشكل حكومة جديدة
الخطاب الغير متوقع في توقيت قبله بليلة واحدة كان الريس بيقول سأظل
سبحان مغيّر الأحوال ..!!
وبعدين ما كان من الأول .. تمشي معزز مكرم بناءا على رغبة الشعب
وهم كانوا هيقدروا ده
مش بكل الكره اللي كبر جوا الناس أكتر الـ 18 يوم دول !!


حكومة إسفنجة صحيح
كل ما تضغط عليها تديك أكتر
نشفوها بقي !!



ومن هنا كان سقوط النظام ..
المنظومة كلها إنهارت .. والمستخبي بان والحق هيرجع لصحابه
مش ناقص بس إلا أن مجلس الوزراء ده يتغير
لأنهم برده بنفس التفكير
ونفس النظرة للثورة .. وللشباب
لازم يكون فيه تغيير
الوضع أختلف كتير عن الأول


إن شاء الله الوضع في مصر يكون أفضل
المستقبل يكون أحسن
تحيا مصر


ضحى حلمي

11‏/02‏/2011

دولة التحرير .. مصر الحقيقية


وأخيرا بعد إستمرار عمليات الإلحاح لأجل المشاركة في ميدان التحرير
حققت هدفي وكان ..
التحرير في جمعة "الرحيل" 11 فبراير
بعد خطاب الرئيس اللي نفى فيه تنحيه وإستمراره في الحكم حتى نهاية المدة
كان الوضع اتقلب .. وقولنا الأمن هينتشر تاني
هيحصل إشتباكات مميتة .. والمواجهة هتكون شديدة


خرجت الفجر من بيتي
ومافيش غير الشهادة على لساني .. والدعاء
الخوف كان ماليني .. ودماغي كانت فيها أفكار مرعبة
خوف من مشاهد الموت والضرب قدامي
رعب من فقدان أي حد من أصحابي وأهلي اللي كانوا موجودين
قلق بشكل بشع !


على الطريق .. وخلاص هكون في الموقف
لقينا "اللجان الشعبية"
بتحرك المرور
الساعة 5 الفجر ..
واقفين في البرد مش تعبانين
بينظموا الطريق ..
العربيات اللي كانت داخلة القاهرة والشوارع الجانبية
بمساعدتهم دخلنا الموقف من طريق تاني

لأن الأساسي كان مقفول
بإستعدادات أمنية
لمنع أني محاولة تعزيز للشعب في التحرير



ونزلت من المترو قرب الميدان
وكملت الباقي مشي ...
مشهد الناس المتوافدة من 6 الصبح للميدان
والشباب الموجود في كل مكان
يشجع أنك تشارك معاهم


على مدخل التحرير اللي دخلت منه
المداخل مقفولة وتحت حماية عربيات ودبابات الجيش
ولجان التفتيش ..
لقاء بإبتسامات وبكل أدب وإحترام (البنات على اليمين)
توجيه ناحية لجان البنات وكان ده النظام دائما ...
قابلتني البنت وأساسي طلبت تشوف البطاقة .. اللي كانت جاهزة أول ما قربت
بعدها أستأذنتني تفتشني "معلش مضطرين" مع سؤال إذا كان معايا أي أداة حادة
(مقص , قصافة , بنسة شعر حادة) في جيوبنا أو الشنط
وقالت أنهم بيصادروا الحاجة دي وبترجع تاني وأحنا خارجين ..
وهي بتفتشني .. شكت أن معايا حاجة
في جيبي اللي كنت حاطه فيه الفلوس بشكل مش مرتب

فحست هي بيهم كأداة حادة !!
وطلبت مني اوريها أنهم فعلا فلوس .. بعدها أعتذرت لي لو كانت ضايقتني
وسمحت لي بالدخول



وأخيرا .. أنا داخل التحرير
كأني لأول مرة بشوفه .. مكان تاني خالص
دولة صغيرة داخل الدولة ..!!


اخدت جولة فيه في البداية .. إستكشافا لمعالم الميدان
معالم المعارك اللي حصلت في أول أيام الثورة
مدرعات الأمن المحروقة والمتحف المصري ومقر الحزب الوطني
لافتات مقرات المحافظات - لكن مش كلها -
مقر إتحاد شباب الثورة
وبعض مجموعات الفيس بوك


إذاعة وشاشات عرض .. والصوت واصل لكل الناس
عشان العروض والشخصيات المهمة اللي بتطلع تكلم الناس
ومشاركات الناس المختلفة من قصص وشعر
ومستشفى ونقاط إسعاف منتشرة ..
أماكن الأكل والشرب .. مطاعم وكافيهات صغيرة
الحمامات ومكب النفايات وسلال الزبالة في كل مكان


لجان بين الشباب مقسمة حسب المهمة ..
لجنة النظافة .. منتشرين في كل مكان في مراقبة لتصرفات الناس
وأمرهم بالمحافظة ع النضافة

شباب بيكنسوا وبينضفوا بعد ما بقى المكان متاح فيه الحركة من ضغط الناس بالليل
لجنة الإسعاف أو المستشفى .. الدكاترة معروفين بالبلاطي البيضاء
وكل دكتور على صدره بطاقة تعريفية بأسمه ومهمته
واللجان المسئولة عن التنظيم .. تنظيم الحركة بين الناس
غير الشباب اللي كانو بيلفوا يوزعوا مأكولات على كل الموجودين
فطرت فول .. وحليت بالتمر .. واتسليت بالنعناع
واخويا اتغدى سجق !!
أي حد كان في أيده حاجة .. بيشارك بيها اللي كانوا حواليه
وممنوع أنك ترفض .. ده حقك كمواطن داخل دولتهم !


الفنانين والأدباء كان لهم ركن لعرض أعمالهم
لوح ولافتات في مكان ..
لافتات مختلفة بمطالب الشعب بكل الأحجام الخطوط
لافتات (ارحل) المنتشرة جداااا
غير الأعلام بأحجامها ..
رسوم على الأرض بأطباق البلاستيك والطوب
والطباشير الأبيض والملون ..
العازفين في كل ركن وحواليهم مجموعات صغيرة بتشاركهم الغناء


أهالي الشهداء وأصحابهم موجودين
بيحكوا عن شهدائهم وعن ازاي اتقتلوا مختلطة ببكاء كل الحضور

غير صورهم المنتشرة في الميدان ..
لافتات وصور مبروّزة

ولوح للي حابب يكتب لهم حاجة ...
والهتافات المختلفة في كل مكان


أكتر حاجة عجبتني في دولة التحرير
أن سلوكيات الناس وأخلاقهم ظهرت من تاني
إبتسامات متبادلة بين كل الناس ..
كان فيه قلق من التحرشات والمضايقات في جو الزحمة المرعبة اللي في مكان
لكن مافيش حد لمسني عند عمد أو مضايقة
وماحدش عاكس نهائيا .. التعامل بإحترام
وكل ما حد يخبط فيا كان يقول : أنا أسف
ويوسع لي المكان اعدي وبعدين يعدي ورايا !
ولو حد عاوز يعدي كان بيقول : بعد أذنك .. لو سمحت
أثناء تحركات البنات .. الشباب كان بيدي أمر فوري
أنهم ياخدوا بالهم ويفسحوا طريق ليهم


أكتر حاجة حصلت عمري ما انساها ..
مجموعة من الشباب كانوا بيغنوا وكان معاهم ألعاب نارية
بمجرد ما ابتدوا يلعبوا بيها !
حصل هلع ورعب بين الناس
ولما الدخان خف .. هتفوا حواليهم
"لا لا .. سلمية سلمية"
وطلبوا منهم يبطلوا وإلا هينطردوا من الميدان
وفعلا توقفوا عن إشعال الألعاب النارية
ورجع تاني المكان سلمي جدا


وفي تغيير للمكان .. توجهت إلى ماسبيرو
المكان برده مقفول ومحروس بالجيش ولجان التفتيش
نفس المعاملة الطيبة ..
بوجود نقطة إسعاف عشان لو حصل أي حاجة
إعتصام الناس سلمي ..
وإلتزام بعدم تصوير جزء من حرس المبنى
عرفت بعد كدة أنهم تقريبا عندهم إستعداد يضربوا نار في أي لحظة
ومش عليهم لوم
وكنت
لأول مرة اقول النشيد الوطني وأنا حاسة بيه من كل قلبي


خرجت من الميدان 2 الظهر على بيتي
حزينة أني سايبة الميدان وراجعة .. كان نفسي اقعد ولو لـ بالليل
احضر خطاب التنحى مع الناس واحتفل
لو كان بأيدي مستحيل كنت هتحرك


لكن خرجت مطمنة جدا .. ومش خايفة من أي حاجة مهما حصل

مطمنة على الشعب وعلى البلد ..
فخورة أني مصرية جدا

وسعيدة أن فعلا لسه فيه خير .. ولسه فيه أمل

ستظل دائما مصر محروسة


ضحى حلمي

02‏/02‏/2011

الغضب .. إلى أين؟؟


أنا واحدة من الناس اللي كانوا بيسخروا من فكرة 25 يناير ..
لأنها كانت هتبقي زي أي مظاهرة شوية وخلصت

واللي كنت بسخر منه أكتر كلمة "ثورة" ..
كأننا بنقول للأمن توقعوا مننا أي تجاوز

لكن اللي خلى الموضوع حقيقي مشاركة كل جهات المعارضة الموجودة ..
واللي اتقال عنها مظاهرة سلمية



وخرجت فعلا المظاهرة سلمية لحد ما ابتدا الضرب
استفزوا الناس يردوا عليهم ..
واستفزوهم أكتر بعدين بحجب المواقع الإجتماعية
ده على أساس أن الشباب مش هيعرف يوصلها تاني !
قاموا كملوها بقطع كل الإتصالات والنت !!
ووقفوا السكة الحديد .. وبقي صعب الدخول للقاهرة وإسكندرية


استفزوا كل الناس .. مش الشباب بس

بأنهم يخرجوا للشوارع
ماهو مبقاش فيه غير المظاهرات
الدنيا كلها وقفت .. كله أخد إجازات لدواعي أمنية
ده غير البورصة اللي ضربت والإقتصاد اللي وقع
وارتفعت اسعار كل حاجة


والإستفزاز الأكثر .. أن ماكانش فيه أي رد على الناس
لا وزراء ولا أعضاء مجلس الشعب
كل المسئولين اختفوا إلا عدد قليل منهم كلامه ماكانش له فايدة
وبعدين طلع لنا الجيش قال يعني هو اللي هيفض الناس
والمفروض انه كان ينفذ قرار حظر تجول
وماحدش كان بيسمع لهم ...
وطبعا مايقدرش يهجم على الناس


لحد ما طلع الريس بالبيان الأول اللي كان مفاده تغيير الحكومة
وماعجبش الناس .. حقهم !
هم بيتكلموا في موضوع .. وهو بيتكلم في موضوع تاني !!
وحتى التغيير اللي اتكلم عنه ماكانش شامل ..
وفضلت أسماء كتيرة في الحكومة الجديدة من الحكومة القديمة
يعني هي هياها !!!
طبعا استفز الناس أكتر .. وخرجت مظاهرات اكتر


مع إختفاء الأمن .. زاد الوضع سوء

حرايق في كل مكان طالت البيوت نفسها
وبعد فتح السجون وتدمير بعضها .. خرج علينا المساجين والبلطجية
وابتدوا السرقة والنهب والتخريب في كل حاجة تقابلهم
والله اعلم التخريب وصل للممتلكات العامة وممتلكات الناس !! بس أكيد وصل لبعضهم
زي ما وصل للمتحف المصري .. ربنا يستر عليه


وبعدين خرج الريس بالبيان التاني

وكان المفروض أنه إلى حد ما يرضي الناس
اعلن فيه عن تنفيذ بعض مطالب الشعب
لكن الشعب استمر في اللي هو فيه .. والوضع زاد سوء أكتر
وماحدش عاوز يهدى


الكارثة أننا ناسيين أن فيه أرواح ناس بتضيع
وفيه إصابات خطيرة
وفيه ناس مش عارفة تقبض مرتباتها
وفيه مصالح واقفة كتيرة


كفاية خراب لحد هنا
حتى ولو كان المتظاهرين مش هم المتسببين في الخراب ده
فالمفروض نهدى شوية ونستنى تنفيذ الكلام اللي اتقال أنه هيتنفذ ده
وبعدين نبقي نولعها تاني لو ماحصلش
على الأقل نلحق جزء من اللي باقي سليم لسه


لو كان مطلبنا "رحيل الريس"
نصبر عليه الكام شهر الباقيين دول ..
يمكن يعدّل فيهم شوية الكلام اللي اتقال في البيان التاني
وبعدين في إنتخابات الرئاسة الجاية نبقي ندربكها لو ماحصلش اللي أحنا عاوزينه


حتى ولو رحل .. هيكون وراه النائب اللي اتعين ده
ومش بعيد ما يعملش حاجة من مطالب الشعب
وكدة ماحصلش تغيير برده
وهنستمر في الدمار اللي أحنا فيه وانتهينا !


فين بقي السلمية اللي كانت في المظاهرات !!
أنا مش ضد المظاهرات ولا ضد ثورة الشعب على الظلم
بالعكس معاها جدا وبحرض عليها
لكن ضد الخراب اللي بيحصل ..
حتى ولو كان الخراب طال بس مراكز الشرطة اللي بيتسحل فيها الناس
والحزب الوطني اللي ناهب البلد خيراتها ومبهدل فينا
وضد أن ارواح الناس تضيع كدة ..
وضد الرعب اللي أحنا عايشين فيه ده
الوضع أشبه بحرب أهلية


مستخبي لنا ايه تاني؟؟
ياريت يحصل أي حاجة تهدى الوضع
سواء إستمرار الريس أو رحيله
تغيير الحكومة أو لا
أي حاجة تهدى الوضع ..
بس يكون فيها تحقيق لمطالب الناس


طريق الشارع بقى سهل
والإنذار وصل وبقوة


ضحى حلمي

01‏/01‏/2011

إنفجارات السنة الجديدة !


رأس سنة جديدة وعليكم بالخير
لكني مش بتفائل بالسنين الفردية ...
مافيش بيني وبينها عمار .. وكعادتها لازم تبدأ بمصيبة على دماغنا كلنا
يعني مش مصيبة فردية ...
اقربها : بداية سنة 2009 كانت الحرب على غزة
لو تفتكروا الأيام السودة .. اللي ماكانش الواحد بيقدر يغمض عينه فيها من كتر الرعب !


كمان السنة دي بدايتها غير مبشرة بأي خير
يمر بس 20 دقيقة من السنة الجديدة ...
ويحصل إنفجار جنب كنيسة القديسين في الإسكندرية !!
أنا مش هخوض في أحداث الإنفجار ولا هعرض صور ولا فيديوهات ..
لأن أكيد كلنا متابعين على مواقع الأخبار والجرايد والبرامج الجديد أول بأول
مش طالبة أعصاب بايظة هي !


أنا بس في زوري كلمتين محشورين ..
مش راضيين يتبلعوا ولا حتى بحاجة ساقعة !!
أنا بدي افهم شيء ...
أحنا ايه العداوة اللي بينا وبين المسيحين !
في عيدهم في نجع حمادي .. شوية حلوين فاكرين نفسهم بينصروا الإسلام
وطلعوا يفجروا نفسهم أثناء الإحتفال بالعيد !
وامبارح الله اعلم ملته ايه (ولا ملتهم ايه) اللي طلع فجر نفسه قدام الكنيسة
فين نصرة الدين في القتل؟؟؟!!


مافيش كلمة في الإسلام بتحرّض على القتل ..!
"من قتل نفسا بغير نفس أو فسادا فى الأرض فكأنما قتل الناس جميعا"
و الرسول قال "إن دماءكم وأموالكم عليكم حرام"
منين جبتوا الحق في القتل؟؟؟


وماتقوليش "كفرة !" .. حرام !!
مش من حقك تقول على حد أنه كافر
أنت مين عشان تحكم على حد ؟؟
ركز مع نفسك بس وصلح أخطائك الأول وبعدين ابقي اتجه لأخطاء الآخرين
ربي يصلح حالك


الرحمة حلوة ..
اعتقونا من الحوادث اللي تسد باب الخير دي
هو أحنا ناقصين فتنة !
ده أنا بقيت اخاف اكلم صحابي المسيحين ليشتموني !
بس اقسم بالله العلي العظيم
دينا الإسلامي برئ من البلاوي دي
وبحزن لما بسمع خبر زي ده زيي زيكم بالظبط


السبب في البلاوي دي ..
ناس مريضة سواء مسلمين أو غير مسلمين أو أيا كانوا
بالله عليكم سلام ايه بس اللي بتحلموا بيه ...!

الله يهديكم ويجعل الخير بين إيديكم


ضحى حلمي