(3)
الدروس دي كانت أكتر حاجة خنيقة في حياتي كلها يمكن عشان أنا مبدأتش أخد دروس كتير إلا وأنا في ثانوي ويادوب هما على قد المواد كنت بأخد وبالعافية كمان واللى هيجنني
ازاي زمايلي كانوا بيأخدوا 3 أو 4 دروس في مادة واحدة ؟!!أموت وأعرف كانوا بيجيبوا وقت لكل ده منين ؟!!
ده كدة كانوا بياخدوا حوالى 15 درس فما أكثر !!
سبحان الله كانوا بيجيبوا دماغ تستحمل الكم ده كله منين ؟!!
وكانوا بيلاقوا الوقت لكل دة + المذاكرة فين ؟!!معرفش ليه كنا بنبدأ من أول شهر يوليو أو نصه وكان فيه عدد قليل بيبدأ من أول شهر أغسطس بدري بس هنعمل ايه ؟ هي غتاتة كدة منهم حتى مكناش بنلحق نأخد أجازة ويمرمطونا من 6 الصبح لحد 9 بعد العشاء ونرجع تانى لنفس الموال ده كل يوم والمطلوب أننا نذاكر كويس كمان والكلام ده في اللى المفروض إنها أجازة طب في وقت الدراسة ماشى إنما في الأجازة ! غتاتة غتاتة يعني بس أنا كنت بعيش ولا بيهمني لما بتبدأ الدراسة بعمل المطلوب إنما في الأجازة والله لو وقفوا على دماغهم .. ولكل مدرس قابلته حكاية لوحده سواء في المدرسة أو في الدروس .. مدرسين عاوزين الحرق ومدرسين ترفع لهم القبعة.
نبدأ من المدرسة .. المفروض إنها الأساس مع ذلك محدش بيعبرها وبيسيبوها مهجورة .. بس أنا كنت بحضر - مش أوي يعني - وكل فين وفين لما بلاقي حد غيري حاضر وأوقات المدرسين هما اللى مش بيحضروا .. أنا كنت بروح مضيعة وقت وخلاص وأهو عشان متفصلش بس مش كل يوم مرة أو مرتين في الأسبوع ثلاثة بالكتير أوي .. رضــــا.
والطبيعي بتاعي أنه كان بيحصل مشاحنات بيني وبين المدرسين أصل أنا طالبة مشاغبة جدا بس مش لدرجة الرفد أو الفصل لا دى مواقف مضحكة حبتين .. أيام الإبتدائي كنت مفترية أوي مش مهم ازاي عشان محدش يخاف منى كنت مفترية أوي وخلاص .. وفي الإعدادي كنت منططة المدرسين والمديرة اللى مكانش حد يقدر يتنفس قدامها أنا كنت بجريها ورايا المدرسة كلها كانت بتشد في شعرها مني ولحد الواقتي كل ما تشوف أختي اللى في إعدادي تقولها ضحى دي كانت عفريتة بشكل .. فضحانى دايما بس معرفش ليه بفخر بكلامها ده أنا الوحيدة اللى في دفعتي العار المدرسة كلها فاكراني .. وعفريتة دي أجمع عليها كل المدرسين وأكترهم بتوع التربية الإجتماعية والنفسية – مفييش حاجة أنا بس كنت بحبهم فكنت بقعد معاهم كتير - ومدرس الدراسات الإجتماعية عشان هو أكتر واحد كنت بخرب له الحصة وكل المدرسين بس أنا بحب الأستاذ ده فكنت ببوظ عليه جو الجد اللى كان بيعمله وأقلبله الحصة مسخرة والواقتي إحنا أصحاب وكل ما ازوره مع حد أو مع أخواتى بيحكي أنا كنت بعمل فيه ايه .. مفضوحة دايما.
وفي الثانوي بقي عمري ما حبيت المدرسة ومكنتش بحب اروحها مع انى مكنتش بغيب أبدا في الإبتدائي والإعدادي .. مدرسة كلها معقدين نفسيا وأشكالهم مريبة متفتحش النفس على أي حاجة بس كان فيه كام مدرس كده هما بس اللى زي الفل إنما الباقي كنت دايما بتخانق معاهم أو اخليهم هيطقوا بشوية حركات كده كنت بعملها فيهم عشان مش راضيين يشتغلوا أو لو حد ضايقني بكلمة ولا حاجة .. مدرس الأنجليزي كان بيجي يلاقيني قاعدة مع بتوع أحياء وعامله لهم فرح ومدرس رياضة2 ورياضة1 كنت بطنشهم وبحرجهم عشان كانوا دايما بيحسسوني أني غبية ومبفهمش في الرياضة ومدرس الفيزياء اللى كل الطلبة بيخافوا منه وكل اللى خلصوا ثانوي حذروني منه عشان ميحطنيش في دماغه كان بيصوت منى لحد ما قالي أنا عملت طلب نقل من المدرسة بسببك وباقي المدرسين مكانوش بيدخلوا أصلا ولا أعرف كانوا مين .. عندي سؤال نفسي أسأله لهم ليه بتنادوا علينا بـ (يا طالبة) هو إحنا ملناش أسماء ؟
وفي الدروس بقي كان بأيدي أن لو المدرس مش عاجبني اغيره بس كان فيه ناس كنت مضطرة اتأقلم معاهم عشان بفهم منهم بس مش أكتر من كده .. كان فيه مدرسين محترمين وكان فيه عاهات أنا كان بيجيلي شلل أطفال كل يوم بسببهم .. من المدرسين العاهات كان مدرس الفرنساوي بعد كل حصة كنت بدعى
- يارب مش عاوزة مجموع بس خلصني من الراجل ده.
كان دمه تقيل بشكل لا يطاق وبيستقصد بنات معينة - الحلوين - يغمز بعينه ويقرب منهم ويضحك ضحكة بايخة وغلس غلاسة وماااااايع بس انا مكنتش بديله وش واحرجته كام مرة ولا عنده دم ولا بيحس أصلا أعوذ بالله منه
- قالى مرة : ليه مبتضحكيش يا ضحى .. دايما قرفانة كده فكيها شوية.
- بصيت له برخامة وقولتله : عشان مش كل الناس ينضحك معاها.
دي المرة الوحيدة اللى جابت مفعولها واحرجته وسابني ومشى فورا .. مكانش بيصبرني عليه غير أنه أحسن مدرس وكويس جدا في الشرح.
ومدرس كيمياء شبه المحششين بالظبط أنا بخاف من شكله وكنت بتجنبه بأي طريقة .. كان بيميز بين البنات ويوقع بينهم كان بيتصل في البيوت يحرض أهاليهم على بعضهم لحد ما فيه أصحاب كتير سابوا بعضه بسببه .. ده أنا أخدت عنده شهر وغيرته فورا من خوفي منه.
وكان فيه مدرس فيزياء شكله يقول أنه متدين إنما أفعاله وكلامه عكس كان قليل الأدب جدا وكان بيتكلم في أمور مينفعش تتفتح مع بنات خالص ومكانش فيه أى سبب في المنهج يخليه يتكلم في الأمور دي .. صحابي كانوا بيحكولى كان بيعمل ايه وواحدة كانت بتسجله على الموبايل كل حصة أنا كنت بتنقط من حكاويهم وبحمد ربنا أني مأخدتش عنده .. أنا كنت باخد عند عاهة تانية كان رغاي وردوده سخيفة وبيضحك بلا داعي لما واحدة كانت بتسأله سؤال كان بيضحك قبل ما يرد ليه الله أعلم تقريبا السؤال كان بيزغزغه بس كان كويس فكان لازم استحمله.
مدرس علم النفس على قد ما هو محترم على قد ما ضايقني جدا في موقف ما .. حصل أنه في حصة كانت عن اللإنحراف قال فيها أن اللى أمهاتهم أو آبائهم متوفيين بينحرفوا مسابليش فرصة أنى أعترض أنا زي الفل أهو لا انحرفت ولا حاجة ولما قولتله أقسم أنه مقالش الكلام ده أبدا وجبت له كام شاهد مصدقش وفي قلب الحصة سأل الطلبة محدش جاوبه
- قالى : عشان تبقي عارفه أني مقولتش كدة أنا بقالى 11 سنة بقول الكلام ده مش هغلط السنة دي.
- قولتله بعد ما اتنرفزت : أنا مش بكذب وربنا شاهد علي اللى أنت قولته.
ومن بعدها وأنا مش بستحمل منه كلمة واحدة وفين لما أعتذر سامحته بس معاملتي اتغيرت إلى حد ما .. مع ذلك أنا بحترمه وبحبه جدا.
ومن المدرسين اللى أنا بحبهم جدا وبحترمهم أوي مدرس اللغة العربية .. مش عارفه لولاه كنت هعمل ايه أنا مكنتش بحب العربي أبدا حبيت العربي بسببه آآه كنت بشوف نفس المعاناة في المذاكرة إنما كنت بحب المعاناة دي أوي كان بيحسسني أن العربي دة حاجة لذيذة جدا والنحو اللى عقد خلق الله أنا كنت بموت فيه .. كان دايما يقولي أنتى عندك حس بلاغي عالي أوي مع أن عمري ما حبيت الشعر بس عشان أنا كنت بجيب النهائيات في البلاغة وبسبب الجملة دي أنا بجد حسيت أني ممكن أحب الشعر وبدأت أقرأ فيه وأهو يعني شغالة برده .. المدرس دة فيه حاجات جميلة أوي محترم أوي ولذيذ جدا وحبوب بجد أستاذ في منتهى الجمال كان دايما بيدينا نصايح في الدين وفي حياتي وكان بيسمع لمشاكلنا وكان بيساعدنا في كل حاجة حتي في الأمور الخاصة.
مدرس الرياضيات اللى شاف مني حركات ومواقف في غاية الهبل كان يصوت ويقول لي
- أبوس إيدك ذاكري أنا عاوز أشوف هتجيبي ايه لما هتذاكري
- الله ! طب مانا بجيب درجات كويسة أهو مش لازم أذاكر
- يا الله ! طب عشان خاطري بس ذاكري
أنا كنت بهاوده وأسكت وبرده ما أذاكرش .. أول مرة أعرف أن الرياضة بتتذاكر كنت بكتفي بحل الواجب حلوين أوي الـ 10 مسائل اللى كنا بنأخدهم واجب .. كان بيكره فيا هدوء أعصابي أصل الصراحة أنا باردة أووووووي أروح له الدرس متأخرة وصباح الخير وأسلم وعااااااادي .. دماااااغ.
مدرس الأنجليزي هو الأكثر كوميديا فيهم الراجل دة عصبي أوي بس عصبيته كوميدية جدا وكان دايما يهزأنا بداعي و بدون داعي كان يقول لنا يا فاشلة ويا ساقطة لو واحدة قصرت في المذاكرة أو معملتش حاجة من اللى طلبها ويقول لنا يا عصابة لو واحدة اتكلمت أو مش منتبهه معاه وشتايم كتيرة بلاش أقولها عشان أخلاقكوا متبوظش .. لازم نأخد كلمة من دول كل حصة ولو متعصبش ومهزأناش يبقي مش طبيعي أبدا بنعرف أنه متضايق على طول .. الراجل دة كان بيجي له شلل رباعي بسببي بردة بيكره هدوء أعصابي وهما كام يوم كدة اللى أتوترت فيهم كان يبقي سعيد وفرحان عشان أخيرا لقاني بحس زي باقي الطلبة.
كل مدرس عرفته له حكاية لكن دول هما اللى عمري ما هنساهم أبدا .. شكرا لكل المدرسين اللى قابلتهم في حياتي لأن كل واحد أثر فيا بشكل أو بأخر.
ضحى حلمي
