17‏/12‏/2009

أول فبراير .. يوم في حب مصر




أول فبراير ..
يوم في حب مصر



خبر جريدة عين 17 ديسمبر 2009 .. كتابة بسنت ابراهيم



يا تري ممكن نستفيد ازاي من التجمع الكبير للشباب في حب مصر وانتمائهم لبلادهم وياتري كل واحد فيكم بيقرا الموضوع دلوقتي فكر هيعمل ايه إيجابي في اليوم ده ((لمصر))؟




في الفترة الاخيرة بقي طبيعي انك كل ما تدخل الفيس بوك تلاقي جروب لحب مصر أو لرسم أطول علم لمصر وهكذا 100 جروب وجروب كل عناوينهم ((مصر .. مصر)) النهاردة بنقدم لكم نموذج منهم وهو جروب "أول فبراير عيد الانتماء .. أنا مصري" وهدفه أن يكون أول فبراير عيد كل المصريين عيد انتمائنا لمصر نفتخر ببلدنا ونحس بيها من غير حاجة .. نحتفل كل سنة في يوم 1 فبراير وكل واحد فينا يقول بعلو صوته "أنا مصري".


جروب "أول فبراير عيد الانتماء .. أنا مصري" وصل في وقت قياسي إلى ما يقرب من ألفين عضو والهدف إنه يوصل لعشرة آلاف عضو على الأقل قيل يوم الاحتفال.


أما عن سبب اختيار أول فبراير تحديدا كما أوضح أصحاب الجروب فهو يرجع إلى الزعيم المصري أحمد عرابي الذي يعتبر أول مصري قرر الاعتراف بهويته بعد سنوات طويلة من فقدانها.


وفي أول فبراير تم إلقاء القبض عليه وأعلنت انجلترا احتلالها لمصر ((عرابي)) الذي يعتبر أول واحد رجع كلمة ((أنا مصري)) بعد سنين كنا عايشين فيها كتابعين للدولة العثمانية.


محمد التهامي 24 سنة كاتب وصاحب فكرة الجروب بيقول:
الفكرة بدأت بأن ليه مش بيظهر حبنا لمصر إلا لما يكون فيه مباراة كرة قدم ليه ما يكونش فيه يوم اسمه عيد الانتماء؟ عيد لبلدنا .. بس ده مش معناه أننا هنحب البلد في اليوم ده بس كمان نفسنا نشجع الناس إنها تحب مصر وتفتخر بمصر وتحب كل شيء مصري .. ضحى حلمي 17 سنة طالبة ثانوي ومديرة الجروب بتضيف: إن إحنا مصريين هدفنا نعمل حاجة لمصر .. ومن حقل كل المصريين يشاركونا في مشروعنا وبالفعل شباب كتير متحمسين للفكرة وبيشاركونا من كل محافظات مصر وعن الدعم فلحد دلوقتي العيد قائم بجهود ذاتية لغاية ما نلاقي حد يدعم الفكرة وإحنا بنرحب بكل الأفكار وبأي حد عايز يشاركنا.


وتكمل ضحى قائلة: اليوم ده هيكون عبارة عن احتفال يشارك فيه كل المصريين من مختلف الطوائف والفئات وهنغني لمصر وهنعلق أعلام بلدنا في كل حتة وهنفتخر بكل حاجة مصرية.


وكمان فيه مفاجأة أول مرة نقولها إننا هنكرم عشرة شباب شايفينهم نماذج مشرفة في مصر في كل المجالات وفي النهاية بندعوا صحفية ((عين)) أن تكون راعي لحملتنا "عيد الانتماء المصري".

ليست هناك تعليقات: