01‏/07‏/2010

سنة أولى على قدي


مدونتي الصغيرة على قدي ......

بمناسبة مرور سنة على ميلادك .... كل سنة وأنتي معايا

أول يوليو بالنسبة لك وبالنسبة لي مهم .. ذكرى مسحتها من أجندتي بميلادك

زي النهاردة السنة اللي فاتت كنت لسه بفكر هكتب أول بوست فيكي ايه .. كان هو أكتر واحد محيرني .. ماكنتش عارفة أكتب أنا مين؟ ولا عاوزة ايه؟ ولا أكتب أنتي ليه أسمك على قدي ...؟!!

ساعتها كتبت اللي خطر على بالي واللي تقريبا جمع كل إجابات الأسئلة دي في أنك على قدي مساحتي الخاصة

أنتي منفذي .. أرشيفك فيه كتير من كتاباتي اللي خرجت للنور وكتير كتير من المسودات اللي ما زالت في مرحلة التكوين واللي مش هتظهر أبدا للنور واللي بفضّل أني احرقها لتظل دائما في صندوق أسراري الخاصة .. أنتي بمثابة كشكولي الأزرق اللي بكتب فيه كل ما يدور برأسي .. رسايلي لـ أمي ... تفاهاتي ... جنوني ... خواطري ... يومياتي الثانوية ... تجاربي الخاصة ... و ......... إلخ من مكنوناتي

أنتي مساحتي الخاصة .. مذكراتي اللي بخبيها من أخواتي وبابا عشان مش يشوفوها .... مملكتي أنا

كنت زعلانة أوي أني مش عارفة ألبسك أزرق زي ما بتحبي وزي ما بحب ... لوني المفضل ... مبروك عليكي فستانك الأزرق

خلال السنة دي اكتشفت أني لسة على قدي ... واقتنعت أني هفضل برده على قدي ... مش تواضع إنما إيمان

كل سنة وأنا على قدي


ضحى حلمي

هناك 3 تعليقات:

زهرة يقول...

كل سنة وانتى هنا .. وانتى نفسك .. وانتى ناجحة وسعيدة .. ومنورة الدنيا يا ضحى

كل سنة وانتى على قدك يا ستى ^_^

Mohamed Gabriel يقول...

كل سنة والمدونة وصاحبة المدونة بخير
:)
وعقبال مليون سنة
وصدفة حلوة برضة انا كمان بحتفل بعيد ميلاد المدونة التانى

sinarest يقول...

كل سنه وأنتي علي قدك جميلة بأفكارك متطّلعه بأحلامك قويه بأرائك ذكيه بردودك مُعبرة بوجدانك منطلقه بحماسك وأراكي ذات يوماً في أجمل فستانٍ أزرق في العالم تتقلدي أعلي المراتب
كل سنه وأنتي علي قدك
وبتكبري يوم بعد يوم

من صديق لصديق
حامد