21‏/11‏/2009

جواز عن جواز .. يفرق



"لا أنا مستحيل أتجوز جواز صالونات لازم أتجوز عن حب"

استني استني ماتتحمقيش أوي كدة .. فكرتي صح الأول؟ تفتكري إيه الفرق بين جواز الصالونات والجواز عن حب؟! أنا أقولك....
جواز الصالونات هو أنه واحد "ابن حلال" أتقدم لك واتخطبتي له عشان هو كويس وإمكانياته كويسة وطيب ويعرف يعيشك في مستوي كويس بس أنتي ما بتحبيهوش .. الاعتراض في أنك ما بتحبيهوش.


أما بقي الجواز عن حب هو أنك كنت "مرتبطة" بواحد قبل ما يخطبك وبعدين يتجوزك ده إن كان هيتجوزك يعني.
بندخل في علاقات حب كثيرة وإحنا عارفين أنها فاشلة تماما ونكمل برده وبعد ما تفشل نكتئب وحالتنا النفسية تسوء ونتعقد من الدنيا كلها ويبقوا كل الرجالة زى بعض و بعدين تتجوزي جواز عادي وتقليدي "صالونات" يعني وتقولي نصيبي وتنكدي على جوزك وتخربي بيتك بسبب أنك ممكن تكوني بتفكري في اللي كنت بتحبيه.


ده غير أصلا أن العلاقات دي بتكون في الظلمة من وراء أهالينا ومن وراء الناس ونسينا أن "اللي ما ينفعش يتعمل قدام الناس ما يتعملش من أساسه" وبعد ما الحكاية تتكشف تسوء سمعتك.. ده غير كل ده أننا بنغضب ربنا بعلاقات غير مشروعة.
أنتي لو عاوزة تحبي وهو صرح لك بحبه وعجبك قولي له يتقدم لك وخلى العلاقة في النور قدام أهلك وقدام الناس واضمني لنفسك مستقبل حقيقي .. ماتعلقيش آمال على حاجة مش مضمون استمرارها أصلا.


أنا مش ضد أنك تحبي لكن أتقي الله في نفسك وفي أهلك .. بلاش يا ستي تتقي الله خافي على نفسك خافي على سمعتك بلاش تكوني رخيصة.
ولو أنت معجب بها أتقدم لها وأثبت لها حبك بدل ما تخدعها وتخدع أهلها وتخدع نفسك وإن كان لسه بدري على الأقل عرف أهلها .. وأن كنت مش قد الحب بنحب ليه؟ أصله الحب مش مجرد مشاعر و"بحبك وأنا كمان" و "وحشتني وأنت أكتر" وبعدين؟ مش ده الحب .. الحب مسئولية وحياة كاملة.


بلاش نضحك على نفسنا ونبطل العلاقات اللي انتشرت بطريقة غريبة دي .. جواز الصالونات مش وصمة عار واختار شريكك صح بالطريقة الصح .. ومش عاوزة أسمع سؤال "أنتي مرتبطة؟" ده تاني.



ضحى حلمي

هناك 7 تعليقات:

بدراوى يقول...

الصورة مناسبة جداً
لمضمون البوست
اللى متفق معاه فى كل كلمة

Mohamed Hamdy يقول...

بوست جميل اوى وانا سبتلك كومنت كمان فى صفحة الويب سايت وهو دلوقتى فى مرحلة المراجعة عشان يتنشر
قلمك سهل وبسيط وعبقرى فى نفس الوقت
تقبلى مرورى

bos bos يقول...

هو ده اللى بقوله ومقتنعة بيه جدا مفيش مشكلة من الحب ولكن مش نمشى مع بعض بقى ونقضيها وننسى الصح والغلط والعيب والحرام مفيش مانع من الحب

انتى حبيتى واحد وهو حبك وصرح لك بحبه طيب جميل خلاص بقى يبقى يتفضل من باب البيت ولكن غير كده ما ينفعش

موضوع هايل يا جميل

AMIR يقول...

كملى انتى على حق.....بس فعلا كل واحد بياخد نصيبه..........AMIR

omkakachi يقول...

انا منى الجزائرية اسفة لانني كل ما اتكلم مع مصري و الله يبدا يشتم في الجزائريين ايش عاملينلو و الله اعلم فكيف لي ان اشارك في blog للمصريين عشان يهجمو علي ب الشتائم لا انا هكذا مرتاحة و اسفة انا بدوري للوقت احب المصريين الله يهدينا اجمعين

Doha Helmy يقول...

إلى مني الجزائرية اعتذر عن الشتائم اللى اتقالت لك
وشكرا لحبك لينا وأنا كمان بحب الجزائريين

لكن يا مني مافيش شتايم هنا في الـ Blog بتاعتي ولو حد شتم تأكدي أني مش هسمح بيها :)

sinarest يقول...

الله أكبر رأي سديد و تحليل جميل جدا وشامل يا ضحي ويارب تبقي قدوه جميله للبنات اللي في سنك دا وأشوفك في يوم م الكتاب الكبار الذين ينيروا لنا الطريق