23‏/09‏/2009

تكتيك النفسنة


(6)





أثناء مانا بذاكر في ليلة تعيسة من ليالي المذاكرة واحدة صحبتي من اللى ربنا أنعم عليهم وخلصها من عذاب الثانوية الهم دي بعتت لى رسالة SMS كانت
((تعريف طالب ثانوي عام: هو كائن نصف حي مقروف دراسيا محبوس يوميا ومحتاج طبيبا نفسيا))
وقتها قولت في نفسي آآآه يا منفسنة يا معفنة .. لا مؤاخذة.


أتاري بقي مش هي بس اللى منفسنة .. النفسنة دي وباء منتشر أصلا ولو ركزت شوية هتلاقي كل خلق الله منفسنيين وفي الدراسة النفسنة لها شكل مختلف طبعا في أني أكون مثلا مش طايقة واحدة زميلتي ومنفسنة منها فأعمل فيها حركة من الحركات القرعة اللى بتتعمل .. أنا شخصيا معملتش حركة قرعة قبل كدة إنما اتحكي لى كتير أوووي .. الحركات القرعة دي حركات بتتعمل عشان خاطر أعطل حد أو أعمله مشكلة أو أضايقه وأحبطه في الثانوي بالذات دونا كل المراحل الدراسية الأشكال دي كتيرة.


الأختين الحلوين هناء وشيرين صحاب أوووي ويعرفوا عن بعض كل حاجة وكل واحدة فيهم عارفه عن التانية هي بتعمل ايه خاصة في موضوع الدراسة ده مفيش واحدة فيهم بتخبي حاجة عن التانية .. شيرين بتاخد درس من ورا هناء عند الأستاذ اللى ربنا ابتلاه وبقي مدرس ثانوي ومقالتلهاش عشان لو قالت لها هتيجي معاها ويمكن تبقي أحسن منها فالأفضل أنها متقولهاش وتفضل على عماها كدة ومتعرفش حاجة عشان هي تبقي أحسن منها وتجيب نتيجة أعلى.


وفي ليلة بتذاكر فيها شيرين هناء عارفه أنها بتذاكر الواقتي تتصل بيها تكلمها وتشكي لها أنها مش عارفه تذاكر ومحبطة وحاسه أنها مش هتجيب حاجة ومش هتعرف تحل في الإمتحانات وتعيط شوية بتاع ساعة ولا اتنين المكالمة دي وتبقي كدة عطلتها عن المذاكرة ونقلت لها شحنة زي الفل تخليها تبطل مذاكرة أصلا وتقعد تلطم جنبها وتقفل الخط وتسيبها ضاربه بوزو ومش عارفه تفتح كتاب وهي الناحية التانية غي عينيها نظرة شيطانية الست عرفت تظبطها بقي.


و مرة الاختين الحلوين اتقابلوا في درس تيجي شيرين تسأل هناء ذاكرتي امبارح؟ هناء تحلف لها بكل الأيمان أنها مفتحتش كتاب وأنها معرفتش تذاكر وخايفه من الأستاذ رغم أنها طول الليل شغاله دح الله ينور طول الليل وجايه عينيها مفقفقة وبتبرر ده بأنها كانت بتعيط طول الليل .. وأول ما الدرس يبدأ والأستاذ اياه يسأل تلاقيها بتجاوب بربنط وشيرين مذهولة مش دي اللى كانت بتلطم برا على وشها ولا أنا بشوف غلط ولا ايه !!


شيرين عارفه أن هناء بتاخد أكتر من درس في المادة .. في لحظة كدة خطر على بال شيرين أنها تعمل حركة قرعة في هناء جامدة تروح للمدرس الأساسي اللى بتاخد عنده تروح تقوله أنها بتاخد عند أكتر من مدرس تاني فيقلب المدرس عليها ويبطل يهتم بيها وبيطل يسألها ويبص لها بقرف ويتجنبها خالص ومش بعيد يطردها كمان والبت تبقي مش فاهمه بيحصل ايه اصلا وليه المدرس بيعاملها كدة وشيرين ولا كأنها موجودة ولا كأنها هي السبب في اللى بيحصل ده.


هناء تتصل بوالدة أو والد شيرين تسألهم على شيرين وبعدين الكلام يجيب بعضه تقوم تبخ في ودانهم كلمتين من اللى هما يقوموهم على شيرين عشان تغم عليها وتقلب البيت عليها وترجع تاني يوم تشكي لها وهى تسمع لها بتركيز أوي وكأنها متعرفش حاجة وتزعل عشانها ومش بعيد تنسجم معاها أوي وتعيط لو عيطت.


كفاية على هناء وشيرين فضايح لحد هنا بس برده فيه حركات تانية غريبة منهم أن فيه واحدة اتعرف عنها أنها مش بتستخدم غير قلم واحد بس في المذاكرة وفي الدروس وفي كل حاجة فكان دايما واحدة تاخد القلم بتاعها تشوف الحبر فيه خلصان منه قد ايه وغالبا كانت تلاقي أنه قرب يخلص تقول في نفسها ((يابنت الآية يا سوسة كل دي مذاكرة)) .. الله أكبر يا شيخة طب قولى يارب يوفقك أعوذ بالله .. أنا نفسي كان بيحصل معايا حاجات من دي اشهرهم واللى كنت بسمعها واللى كان بيتقالى منها كتير أكمني مش بكتئب أصلا ولا بتضايق ولا مرة زمايلي شافوني حزينة إلا قليل كنت أبقي معدية مثلا اسمعهم بيقولوا ((بصي مبتسمة ازاي ولا هاممها حاجة)) ابص الاقي النظرات فظيعة جدا.


الغريب بقي أن كل يوم بتظهر حركات من دي كتير أوووي ومتعرفش ازاي اللى بيعملوا في بعض كدة أصحاب دول أكيد ومستحيل يكونوا أصحاب .. ومحدش يفتكر أني أنا الملاك البرئ بتاع الدفعة بالعكس دأنا أكتر واحدة منفسنة فيهم والدليل أني أجيت سيحت للبنات.




ضحى حلمي

هناك 6 تعليقات:

احمد المصرى يقول...

مواضيعك جميله والاجمل منها انه يكون فى حد من كفرالشيخ تدويناته جميله كدة عموما سعيد بمرورى على مدونتك وارجو تزورى مدونتى وعلى فكره انا من كفرالشيخ

غير معرف يقول...

جميله يا ضحى يا قمر

بس اسالينى انا يا اختى عن النفسنة دى

اة من ايام الثانويه العامية واللى جرالى فيها من التعطيل والتليفونات والاحباط بس صحبتى بقى مكنتش زى هناء ولا انا كنت شيرين دى كانت قمر وهى هتبقى مهندسة قد الدنيا وانا صحفيه ربنا معايا هههههههههههه

بس انا شفت نفسنة كتييييييييير ومدوباهم اتنين

مدوناتك حلوة... ومستنية زيارتك عندى

Doha Helmy يقول...

أحمد : شكرا لزيارتك عندي وأتمني تكون المدونة عجبتك فعلا

"جميله يا ضحى يا قمر

بس اسالينى انا يا اختى عن النفسنة دى

اة من ايام الثانويه العامية واللى جرالى فيها من التعطيل والتليفونات والاحباط بس صحبتى بقى مكنتش زى هناء ولا انا كنت شيرين دى كانت قمر وهى هتبقى مهندسة قد الدنيا وانا صحفيه ربنا معايا هههههههههههه

بس انا شفت نفسنة كتييييييييير ومدوباهم اتنين

مدوناتك حلوة... ومستنية زيارتك عندى"
أنا معرفتش أنتي مين؟؟
عرفيني أنتي مين وابعتي لى لينك مدونتك هزورها على طول :)

زهرة يقول...

يا ستى يا ستى انا سلمى من الشرقيه بدرس إعلام (مهنه البحث عن المتاعب)
وآآآآآآآآآآآآآدى مدونتى

http://zahralamtanbot.blogspot.com/

هجيب الحاجه الساقعه واستناكى

Darsh Basha يقول...

هو كدة شغل النفسنة دة
بس اقولك على حاجة
شغل النفسنة دة عند البنات عموما
اما عند الولاد ..فمش بتلاقية
لان الواد مش محتاج ينفسن ولا يعيط فى التليفون ..لانة فعلا مبيذكرش
وبيبقى مكبر دماغة من المواضيع دى
الا بقى ممكن تلاقية شوية عند العالم المحيطة(ربنا يبعدنا عنهم)بس نفسنة متغيرة شوية عن دى.

على العموم ..كل سنة وانتى طيبة

Doha Helmy يقول...

سلمى: اهلا بيكي .. أنا زورت المدونة بتاعتك جميلة ماشاء الله :)

---

درش باشا: أحب اقولك ان الولاد برده منفسنين لأن كانوا دايما بيتكلموا علينا وعلى قد ايه احنا بنذاكر او بناخد دروس او اى حاجة لها علاقة بالدراسة .. دول كانوا اكتر ناس منفسنة لأنهم دايما كانوا مركزين معانا D: